Mar 7 | ZomZIV | STEP | Jerusalem panin Pharisee-te le thukham siate pawlkhat Jesu kiangah va kikhawm uh a,

Mark 7

A Siang le a Nin

1 Jerusalem panin Pharisee-te le thukham siate pawlkhat Jesu kiangah va kikhawm uh a, 2 a nungzuite pawlkhat in ngeina banga “siang lo”—tua pen biakna ngeina a silsiang loh khut tawh an a nek laitak uh a mu uh hi. 3 (Pharisee-te le Jew-te khempeuh in upate tang ngeinate a kipletna un a ngeina bangin khut sil masa loin an a ne kei uh hi. 4 Sum zuakna mun pan a ciah uh ciangin kisil masa loin an a ne kei uh hi. Tua ciangin haite, tuivotbeelte le niangbeelte sawpsiangna-a kipan tang ngeina adang tampi a tang uh hi. ^{▼▼7.4 Khutgelh masa pawlkhat ah tuivot-beelte, niangbeelte le annek tutphahte}) ^b

5 Tua ahi ciangin Pharisee-te le thukham siate in, “Bang hangin na nungzuite in khut sianglo tawh an a nek uh sangin upate tang ngeina bangin gamta zaw lo uh ahi hiam?” ci-in Jesu a dong uh hi.

6 Amah in, “No kineihsiamte tawh kisai-a Isaiah in a genkholh hih banga kigelhsa:

“‘Hih mite in a muk uh tawh kei hong pahtawi uh a,
ahi hangin a lungtang uh kei tawh kigamla hi.
7 A mawkna in kei hong bia uh a,
a thuhilhte uh mihing bawltawm ngeina ahi hi,’ ^{▼▼7.7 Isa. 29:13} a cih man mahmah hi.

8 “Note in Pasian thupiakte na paikhia uh a, mihingte tang ngeinate na len tentan uh hi,” ci-in a dawng hi.

9 Tua ciangin amah in amaute kiangah, “Na tang ngeinate uh na tan ^{▼▼7.9 Khutgelh pawlkhat ah bulphuh} theih nadingun Pasian thupiakte nawlkhin dan na siam uh hi! 10 Moses in, ‘Na nu na pa pahtawi in. ^{▼▼7.10 Pk. 20:12;Tp. 5:16} A nu a pa a hamsiat mi peuhmah thah ding ahi hi,’ ^{▼▼7.10 Pk. 21:17; Sp. 20:9} ci hi. 11 Ahi hangin note in, mi khatpeuh in a nu a pa-te khatpeuh kiangah, ‘Kei tung pana na ngah ding uh huhnate Corban (Pasian a ki-apsa letsong) hi ta hi,’ na ci uh a, 12 tua ciangin a nute a pate ading bangmah na hihsak nawn kei uh hi. 13 Tua bangin note na kipiaksawn uh na tang ngeinate uh zangin Pasian thu bangmah lo na suaksak uh hi. Tua banah tua bangin na tampi na hih uh hi,” a ci hi. ^g

14 Jesu in mihonpite sam leuleu a, “Na vekpi un ngai unla hih thu theitel un. 15 A pualam pana mihing sunga tumsuk, bangmah in amah a ‘nin’ suaksak thei lo hi. Mihing sung pana pusuakte in amah a ‘nin’ ^{▼▼7.15 Khutgelh pawlkhatah ‘sianglo’} suaksak zaw hi. 16 Zak nading bil nei peuh in za ta hen,” ^{▼▼7.16 Khutgelh pawlkhatah tg.16 na om lo} a ci hi.

17 Mihonpite nusia in inn sungah a lut ciangin a nungzuite in hih gentehna thu ama kiangah a dong uh hi. 18 Amah in, “Tua zahin lungmawl zawzen na hi uh hiam? Pua lam panin mihing sunga tumsuk khatpeuh in amah a ‘nin’ suaksak thei lo ahilam thei lo na hi uh hiam? 19 Ahang in, a lungtang sungah tumsuk loin gilpi sungah tumsuk a, tua ciangin pumpi pualamah a pusuak khia hi,” a ci hi. (Jesu in hih banga a gen ciangin ante khempeuh ‘siang’ hi ci-a a pulakkhia ahi hi.) ^j

20 A thugen zom lai-a: “Mihing sung pana pusuak in amah a ‘nin’ suaksak hi. 21 Ahang in, a sunglam mihing lungtang panin ngaihsutna khel, numei pasal paktatna, guktakna, tualthahna, angkawmna, 22 huaihamna, etsatna, zuau tatna, thangtatna, enna, gensiatna, kiphatsakna le hainate a pusuakkhia hi. 23 Hih gitlohnate khempeuh a sung lam pana pusuakkhia hi-a, mihing a ‘nin’ suaksak hi,” a ci hi. ^k

Syrophoenicia Numei khat Upna

24 Jesu in tua mun nusia a, Tyre ^{▼▼7.24 Khutgelh masa tampi ah Tyre le Sidon} kimnai-ah a pai hi. Amah inn khatah luta, ama omsim lam kuama theih ding deih lo napi a ki-im zo kei hi. 25 A taktakin, a tanu sunga kha gilo ^{▼▼7.25 Greek ah nin} a lut nupi khat in ama thu a zak khit phetin va pai-a, a khe phungah a bok hi. 26 Tuanu, Syria gam Phoenicia a suak Greek mi ahi hi. Tuanu in a tanu sunga dawi a hawlkhiatsak nadingin Jesu kiangah a thum hi.

27 Amah in tuanu kiangah. “Tate an nek kim lai laksakin uite piak ding kilawm lo ahi manin, tate in a duh zahzah uh ne masa phot uh hen,” a ci hi.

28 Tuanu in, “Himah hi, Topa aw, ahi hangin sabuai nuai-a uite in zong naupangte annengte a ne uh hi,” a ci hi.

29 Tua ciangin amah in tuanu kiangah, “Tuaci banga nong dawn manin na ciah thei hi; dawi in na tanu a nusia zo hi,” a ci hi.

30 Tuanu ciaha, a sung pana dawi a paikhia khin, lupna tunga lum a tanuno a mu hi. ⁿ

Bilngong-a Pauthei lo Mi khat Damsakna

31 Tua ciangin Jesu in Tyre kimnai teng nusia-a, Sidon kantanin Galilee tuipi ah pai-a tua ciangin Decapolis ^{▼▼7.31 Tua pen, Khuapi Sawmte} kualah a paisuk hi. 32 Tua lai-ah mi pawlkhat in bilngong-a pau-awk pasal khat va paipih uh a, tuapa tungah a khut a ngak nadingin ama kiangah a thum hi.

33 Jesu in tuapa mihonpite lak panin a tang paikhiatpih khit ciangin a khutmete tuapa bil sungah a khum suk hi. Tua ciangin a cil phih a tuapa leii a lawng hi. 34 Vantung lam ento a nakpi-in khuisa-a tuapa kiangah, “Ephatha!” (”Kihong ta hen!” cihna) a ci hi. 35 Tua laitakin tua mipa bilte kihonga, a leiigui kikolin siangtakin a pau thei sensen hi. ^p

36 Kuama tungah a gen loh nadingun Jesu in amaute thu a pia hi. Ahi hangin tua banga thu a piak semsem ciangin amaute in tua thu a gen semsem uh hi. 37 Mipite in lamdang sa lua mahmah uh a, “Amah in na khempeuh a hoihin bawl khin zo hi. Amah in bilngongte khua zasakin, a pau thei lote nangawn a pausak hi,” a ci uh hi.